Два заслужени слободни денови имаа ракометарите на Вардар, пред новиот собир денеска, со кој започнуваат подготовките за последниот дуел од регуларниот дел од СЕХА ГСС-лигата против Веспрем, в сабота во СЦ „Јане Сандански“. Четврто соочување на овие два тима сезонава, а досега „црвено-црните“ немаат позитивно искуство со унгарскиот првак. Меч, кој нема да има резултатско значење, двата тима се сигурни патници на Ф4 турнирот, но ќе биде дуел за престиж.
Истовремено Веспрем ќе значи и генерална проба пред осминафиналниот двомеч со Висла Плоцк во Лигата на шампионите.
АБУТОВИЌ Е ОК
Главниот дефанзивен на Вардар, Илија Абутовиќ, поради повреда го немаше во составот на гостувањето во Прешов, но не се работи за ништо сериозно. Станува збор за вкочанетост во вратот по средбата со Раднички и тој денеска ќе биде на тренинг заедно со екипата. Истото важи и за Алем Тоскиќ, кој поради болки во грбот доби цела недела слободна за одмор и не беше на мини-турнејата.
Во моментов се чека само лекарско мислење за Матјаж Брумен, кој има проблеми со десното рамо. Потребен е одмор и мирување, но и понатаму е неизвесно дали крилото ќе настапи против Веспрем или ќе го чуваат за двомечот со Висла.
СЕЗОНЦИТЕ СО ПРИВИЛЕГИИ ДО ТОП 16 БИЛЕТ
Фановите на Вардар што поседуваат сезонски билети за натпреварите од Лигата на шампионите ќе ја имаат привилегијата први да дојдат до билети за осминафиналниот меч со Висла Плоцк, закажан за 21 март. Од вчера, па сè до 6 март (петок), сите оние што имаат билети може да си го откупат истото место, со приложување на сезонската картичка. Цените на билетите се 400 денари за трибинските места, 600 денари за ВИП, 1.200 денари за ВИП-премиум и 150 денари за стоење. Приоритетната продажбата на билетите ќе се одвива само на билетарницата во СЦ „Јане Сандански".