Рафа Надал побара од организаторите на турнири да ја задржат традицијата на земјени терени на АТП турнејата, откако сè повеќе турнири се „селат“ на хардкорт подлога, на која Шпанецот смета дека се зголемува ризикот за повреди.
Надал, кој во неделата стигна до првата титула во 2015 година победувајќи го Хуан Монако на Аргентинскиот опен во Буенос Аирес, вели дека исто така главен фактор е задржувањето на разновидноста на тениската понуда со што би се задржило вниманието на публиката.
Аргентинскиот опен е во својата 15. година и се игра на земја, иако организаторите најавија дека е можен трансфер на побрза подлога.
„Земјата е традиционалната подлога на нашиот спорт и мора да ја заштитиме. Спортот станува поголем кога комбинираш нови со стари турнири. Правиме трансфер од земја на хардкорт подлога, но потврдата подлога е поагресивна и има се повеќе повреди. Можете да ја проверите статистиката“, вели Надал.
28-годишниот Шпанец одигра само седум меча во втората половина од 2014 година поради повреда на зглобот на раката, но и операција за слепо црево. Титулата во Буенос Аирес беше негова 65 во кариерата, и дури 46 на земја, со што се израмни со аргентинската легенда Гијермо Вилас.
„Најважно е да бидеш здрав не само во текот на кариерата, но и по крајот, бидејќи сите имаме живот надвор од тенисот. Повеќето од играчите на турнејата го сакаат спортот и би сакале да можат да продолжат со некоја активност и по пензијата и да уживаат во животот. Кога јас ќе се пензионирам би сакал да можам да играм фудбал со пријателите, но со толку многу хардкорт подлоги ќе биде тешко тоа да се оствари“, додава Надал.
Следен турнир за него е Мастерсот во Индијан Велс.