„Во следниве 24 часа ќе знам дали е потребно веднаш да се оперира рамото или ќе можам барем да ја доиграм сезоната“ – вели Вардаровото крило
Му се заканува ли на Вардаровото крило Матјаж Брумен предвремен крај на сезоната? Повредата на десното рамо се чини дека е далеку од наивна и првичните лекарски информации се дека е потребна операција на рамото. Брумен го чека конечниот одговор од словенечкиот специјалист, кој треба да му потврди дали хируршката интервенција треба да биде извршена веднаш или ќе може крилото да ја заврши сезоната.
„Најавите се дека е потребна операција на рамото. Специјалист за рамото во следниве 24 часа треба да ми потврди дали веднаш треба да се оперирам или можеби ќе можам да ја доиграм сезоната. Ако е првата опција, тогаш, за жал, за мене сезоната е завршена. Во спротивно не знам како би го решиле тоа. Еве во моментов сум 14 дена надвор од игра“ – објаснува Матјаж Брумен.
Последен натпревар кој го одигра десното крило беше оној против Монпеље и од тогаш е во мирување. Доколку Брумен мора веднаш да оди „под нож“ тогаш како единствено решение на позицијата десно крило до крајот на сезоната Раул Гонзалез ќе го има само Даниел Шишкарев.