Борис Бекер во интервју за германскиот „Тенис магазин“ зборуваше за животот во тенисот, за својот пулен Новак Ѓоковиќ и за неговата техничка и не-техничка страна на играта.
„Новак е поинаков од другите ѕвезди во спортот. Тој поминува многу време на турнејата дружејќи се со своите колеги и е навистина популарен за тренинг. За него секогаш е лесно. Знам дека има добри односи со Бердих и Вавринка, меѓутоа никогаш не тренирал со Роџер Федерер или Рафаел Надал“, вели Германецот, кој е трикратен шампион од Вимблдон.
Тој имаше и коментар за „инцидентот“ од финалето на Австралискиот опен, кога Енди Мареј го обвини Ѓоковиќ дека „глумел“ повреда признавајќи дека тоа му пречело во концентрацијата.
„Дури и Новак има свои добри и лоши моменти и кога играте меч од пет сета, тоа е како бокс. Жал ми е што Енди погрешно го сфати моментот на слабост на Новак, но сите разговаравме за тоа и сè е ОК“, вели Бекер.
Бекер е сигурен дека го тренира најдобриот на светот кој нема конкуренција.
„Тој е најдобриот на светот, најдобриот во својата класа и сите сакаат да го победат. Ме прашувате дали може да ги освои сите четири гренд слема во една година? Тоа е во основа невозможно. Постојат многу различни фактори - здравјето, среќата, тактиката, формата...“, додава Бекер.