Михал Јурецки го заработи третото исклучување, кое и автоматски значи црвен картон во завршницата на натпреварот. И наместо како голем играч да замине во соблекувалната каде неполна минута подоцна ќе го славеше пласманот на „фајнал-форот“ во Келн, тој се одлучи да го провоцира Вардар и со тоа го навлече гневот на целата клупа, се чини најмногу на Игор Карачиќ, но успеаја „црвено-црните“ да ги смират страстите и да го завршат мечот, со кој се простија од најсилното европско клупско натпреварување.
Вардар ќе мора да чека „трета среќа“ за Ф4 во Келн, но дотогаш може да биде и тоа како задоволен со успешната клупска историја која ја испишува во Лигата на шампионите, како македонски претставник кој вторпат едноподруго се наоѓа меѓу најдобрите осум екипи во Европа.