Нов шокантен пораз за најдобриот тенисер на земја во историјата. Рафа Надал не успеа да го помине третото коло на домашниот турнир во Барселона губејќи од Италијанецот Фабио Фоњини.
Дека проблемите на „кралот на земја“ Надал се големи беше јасно и пред стартот на европската сезона на земја, но сепак, никој не очекуваше Фоњини да го победи вторпат во една сезона, откако го елиминираше и во Рио де Жанеиро.
Фоњини лесно го освои првиот сет со 6:4, додека во вториот Надал имаше брејк предност, пред на крајот да загуби во тај-брејкот со 8:6. Фоњини сега има 2-4 скор против Шпанецот.
Досега постоеја многу објаснувања за слабата форма на Надал - од минатогодишната повреда, проблемите со слепото црево, хардкорт подлогите... Поразот од Новак Ѓоковиќ во Монте Карло не е голем проблем, но втор пораз од тенисер како Фоњини во една година донесе до најлош старт на европската сезона на земја.
На еден месец пред стартот на Ролан Гарос, каде што е деветкратен шампион работите не изгледаат добро, и многумина сметаат дека оваа година може да загуби во Париз. Меѓутоа, слична ситуација беше и во 2014, кога тој загуби во четвртфиналето во Монте Карло и Барселона, но потоа доминираше во Париз.
Следниот турнир за него е Мадрид опен, каде што е актуелен шампион, и сè уште постои време да се „сврти“ работата.
Фоњини ќе игра со Шпанецот Пабло Андухар во четвртфиналето. Првиот носител и актуелен шампион Кеи Нишикори влезе во четвртфиналето со лесна победа над Сантијаго Хиралдо и сега игра со уште еден Шпанец, Роберто Баутиста Агут.