Будимпешта, 9 мај 2015 (МИА) - Ракометарките на Будуќност уште еднаш беа „кобни“ за македонскиот првак ЖРК Вардар на завршницата на Лигата на шампионките.
Во полуфиналето на „Фајнал фор’’ турнирот во Будимпешта, вардарки како и лани, така и денеска не успеаја да го минат црногорскиот шампион Будуќност, кој за место во финалето се избори со победата од 27:17.
До десеттата минута се играше рамноправно, по што црногорската екипа направи серија од 3:0, за прво водство на Будуќност од три гола разлика 6:3 во четиринаесеттата минута. Иста таква серија Будуќност направи по втор, по што во 25-минута, стигнаа до највисоко водство од +5 гола (12:7), кое екипата од Подгорица го сочува до крајот на првото полувреме, па на паузата замина со предност од 14:9.
Ваквата предност Будуќност рутинирано ја чуваше и зголемуваше, за на крајот за слави победа со конечни 27:17.
Ракометарките на Будуќност Радмила Петровиќ и Кристина Неагу со по 7 постигнати голови беа најефикасни на натпреварот, додека кај ЖРК Вардар, Андреа Пенезик и Андреа Лекиќ постигна по четири гола. За одбележување е и настапот на Клара Волтеринг која на голот на Будуќност која со 13 успешни интервенции, беше нерешлива енигма за вардаровите ракометарки.
На вардарки им останува во дуелот против руската екипа Динамо Синара од Волгоград, против која сезонава играа два пати во фазата по групи, да се изборат за третото место. Мечот ЖРК Вардар – Динамо Синара ќе се игра утре со почеток од 14 часот и 30 минути.
Во финалето (од 17 часот), Будуќност ќе игра против досега норвешката екипа на Ларвик, која во првиот полуфинален меч го совлада Динамо со 31:22.