Скопје, 10 мај 2015 (МИА) – Ракометарките на ЖРК Вардар втора година во низа завршуваат како трето рангиран тим во елитната Лига на шампионите.
Црвено-црните попладнево во дуелот за третото место на завршниот "Фајнал фор" турнир во Будимпешта ја совлада руската екипа Динамо Синара од Волгоград со 28:26.
Целиот меч мина во рамноправна игра, а на крајот поголемата желба за триумф на нашиот тим му го донесе третото место.
Андреа Пенезиќ со девет голови беше најефикасна во редовите на македонскиот шампион, додека во руската екипа најпрецизна беше Ана Кочетова со седум постигнати голови.
Вардаровата ракометарка Јованка Радичевиќ, победата им ја посвети на припадниците на МВР кои загинаа во акцијата во Куманово, притоа апелирајќи да се сочува мирот.
- Да бидам искрена многу ми е тешко и жал за ситуацијата којашто се случува долу. Луѓе загубија животи, некои останаа без покрив над глава…Ние моравме да играме и ете, ако им е малку за утеха, оваа бронза им ја посветуваме на сите нив. Апелирам, најважно е да го сочуваме мирот и се надевам дека ситуацијата набргу ќе се смири, изјави Јованка со плач во гласот.
Во финалето, за шампионскиот трофеј, играат црногорската екипа Будуќност и норвешки Ларвик, тим кој досега победи на сите натпревари сезонава во Лигата на шампионките.