Во пресрет на неделното македонско дерби со Бундес-лигата, каде Хановер и Филип Миркуловски ги пречекуваат Вецлар и Дејан Манасков (17:15 часот), нашите репрезентативци одлучија да го направат дуелот поинтересен, со провокации преку социјалните мрежи.
Прв започна Миркуловски, кој во средата на својот фејсбук профил напиша „Дејан Манасков се гледаме во недела на дерби и не сметај на бодови“. Два дена подоцна, односно синоќа, Манасков одлучи да му одговори на својот поранешен клупски колегат и репрезентативен соиграч исто така со статус на фејсбук „Филип Миркуловски не сметај на голови во недела против Близнац“.
Двајцата македонски интернационалци првиот дел од сезоната го поминаа во Металург, пред состојбата во клубот да ги натера да заминат во Бундес-лигата. Манасков и Миркуловски приватно се добри пријатели и заеднички се посетуваат и поддржуваат и во Германија, но малку провокација за поквалитетно дерби не е лошо.