Заминувањето на хрватскиот стратег Лино Червар од редовите на сè уште актуелниот шампион на Македонија, Металург, се очекуваше уште на почетокот на годинава, по сите потреси и промени кои се случија во тимот. Дефинитивно збогум Червар ќе каже на крајот на сезонава, а тоа го потврди во интервју за хрватскиот интернет портал „24сата“.
„Се изморив од борбата за Металург и по завршувањето на сезоната се враќам дома. Направив сè што можев клубот да не исчезне, како што тоа му се случи на Атлетико Мадрид. Сакам да минам малку време со внуците“, изјави Лино Червар.
Червар на клупата на Металург помина шест сезони и тој е еден од главните „виновници“ за големиот успех на клубот во Лигата на шампионите.