Трансферот кој се најавува уште од почетокот на годинава, доаѓањето на хрватскиот репрезентативец Лука Циндриќ во редовите на РК Вардар, конечно, се реализира. Вчера, во хотел „Русија“ во Скопје средниот бек и првите луѓе на клубот ја договорија соработката, си подадоа рака, за што добивме и официјална потврда од структурите на клубот, а деталите околу ангажманот ќе бидат дополнително обелоденети.
Доаѓањето на 22-годишниот ракометар во „црвено-црните“ редови се случува само неколку дена откако со „трета среќа“ Циндриќ успеја да го раскине договорот со Металург, со решение на Арбитражниот суд на ЕХФ.
Токму поради административниот проблем, кој бекот го имаше со тимот од Автокоманда се гледаше како главна пречка за неговото доаѓање во Вардар, па како алтернатива за оваа позиција беше најавен и Русинот Павел Атман, кој исто така му беше соиграч на Циндриќ во Металург.
Сега е јасно дека Циндриќ е слободен играч, па неговиот трансфер во Вардар се реализираше без проблеми.
Лука Циндриќ во „црвено-црните“ редови доаѓа како замена за македонскиот репрезентативец Немања Прибак, кој во следните две сезони ќе настапува за турски Бешикташ. Плејмејкерот ќе биде во комбинација со неговиот репрезентативен соиграч Игор Карачиќ.
Циндриќ е четвртото засилување на Вардар во пресрет на новата сезона, со оглед на тоа дека досега се потврдени трансферите на Хорхе Македа, Александар Деревен и Дејан Манасков.