Роџер Федерер го предупреди Новак Ѓоковиќ дека нема гаранција дека тој ќе стигне до својата прва титула од Францускиот опен тврдејќи дека тој и Рафаел Надал имаат големи шанси.
Ѓоковиќ стигна до својот четврти Мастерс 1000 трофеј оваа година во неделата откако лесно го совлада Федерер со 6:4/6:3 во финалето на Италијанскиот опен и според многумина сега е најголемиот, ако не и единствен фаворит пред стартот на вториот гренд слем од сезоната овој викенд.
Србинот, кому во гренд слем колекцијата му недостига само трофејот од Францускиот опен, изгледа удобно на земјена подлога оваа година, и сега има серија од 22 меча без пораз. Осумкратниот гренд слем шампион е фаворит кај букмејкерите, но Федерер вели дека е прерано 27-годишниот Ѓоковиќ да се промовира во шампион.
Швајцарецот вели дека тој има доволно добра игра да го победи Ѓоковиќ во Париз, но и дека Надал сè уште не го покажал најдоброто пред турнирот кој го освојуваше девет пати.
„Не можете да ги одземете минатите 10 години. Се работи за мечеви во кои треба да се освојат три сета. Знаеме колку е Рафа физички и ментално силен. Тој според мене е првиот фаворит. Новак можеби е фаворит според резултатите кои ги покажа оваа година бидејќи наликува на 2011 кога не загуби речиси цела година. Рафа можеби нема ист успех како и претходно, но на крајот сè ова се зборови - на крајот рекетот ќе каже кој е најдобар“, вели Федерер.
Анализирајќи ги сопствените шанси да ја врати титулата која ја освои во 2009 година, Федерер се смета за фаворит од сенка.