Првиот носител, Швајцарецот Стен Вавринка го победи Чехот Лукаш Росол во тешки три сета со 6:4/3:6/6:3 во второто коло на домашниот Женева опен во средата. На Вавринка му беше потребен еден брејк за да го освои првиот и третиот сет, откако се мачеше со својот прв сервис во текот на целиот меч.
Во четвртфиналето, Вавринка ќе игра со 74-рангираниот Аргентинец, Федерико Делбонис, кој со 6:3/6:4 го победи Русинот Андреј Кузнецов.
Во Стразбур пак, Американката Медисон Киз се врати од еден сет и 5:0 негатива за да ја победи хрватската ветеранка Мирјана Лучиќ-Барони со 4:6/7:6(3)/7:6(0) за пласман во четвртфиналето. Киз почна да ризикува откако Лучиќ-Барони не успеа да го добие мечот на свој сервис, а Хрватката потоа имаше шанса да го добие мечот при 5:4 во одлучувачкиот сет, пред да и се „распадне“ играта во тај-брејкот.
„Мислев дека веќе патувам кон Париз“, призна Киз.
ВО РАМКА
Симон неизвесен за Ролан Гарос
Учеството на Жил Симон на Францускиот опен е неизвесно откако светскиот рекет број 13 се повлече од турнирот во Ница. 30-годишниот Французин исто така се повлече од Мастерсот во Рим минатата недела поради истиот проблем со повредата на вратот.
„Опоравувањето оди добро, меѓутоа премногу споро. Имам големи болки и не можам да играм“, вели Симон, кој нема добар скор на Ролан Гарос - најдобар резултат му е четвртото коло во 2011 и 2013.