Она што „Македонски спорт“ го најави уште во текот на јануари оваа година, и официјално беше потврдено во текот на вчерашниот ден.
Информацијата вели дека раководството на РК Вардар го официјализираше тригодишниот договор со 23-годишниот руски ракометар Александар Деревен.
Деревен, кој инаку досега беше дел од екипата на Чеховски медведи, важи за еден од најталентираните леви бекови во Европа. А како дополнение на една ваква констатација говори и податокот дека пред извесно време Деревен е номиниран за најдобар млад ракометар на сезоната во изборот на ЕХФ.
А и онаа другата, која, пак, кажува дека на последното СП во Катар (одржано во јануари), овој млад Русин беше избран во Ол стар тимот на дебитантите.
Во сезоната која полека останува зад нас, посебно оној дел во Лигата на шампионите Деревен постигна 63 гола, сите постигнати во онаа групна фаза од најквалитетното европско натпреварување бидејќи рускиот тим не обезбеди пласман во осминафиналната.
Претходно Деревен како член на екипата на Чеховски медведи беше првак на Русија во 2013 и 2014 година, освојувач на Купот на Русија во 2013 и на Суперкупот во Русија во 2014 година.