Словенечката „звеза“ в среда ќе го соопшти името на новиот селектор на машката репрезентација, а по вчерашното „пребројување“ се чини дека Веселин Вујовиќ е за пола копје пред Раул Гонзалез во изборот. Бранко Тамше, единствениот Словенец кој ги преживеа сите филтри освен последниот, исто така има шанси, но скромни.
„Ќе видиме, јас сум само еден од кандидатите. Изборот е в среда“, изјави за Македонски спорт, Веселин Вујовиќ.
Но, словенечките колеги, кои од дома ги разработуваат опциите, а меѓудругото им пошло од рака да разговараат и со Раул, тврдат дека Вујовиќ е пред промоција.
АГРЕСИВНОСТА (ЌЕ) ПРЕСУДИ
Бранко Тамше им е домашен, Хуан Паштор добил одлични препораки од Дејан Бомбач, а само пофални зборови за Раул имале Матјаж Брумен и Алем Тоскиќ, тврди „Дело“, но словенечката „звеза“ најмногу го сака за селектор Веслин Вујовиќ.
Сите кандидати имаат неспорни квалитети како тренери, а пресудно во оваа приказна би требало да биде агресивноста која Словенците очекуваат Веселин Вујовиќ да им ја пренесе во репрезентацијата.
Поранешниот тренер на Вардар е познат мотиватор, тренер кој успева од тимот да извлече повеќе од максимум, а токму поради недостиг на тој елемент се растури нивната дружба со екс селекторот Борис Дениќ.
Можеби најдобрата препорака за Вујовиќ е неговата работа во Загреб, каде, како што обожаваат да кажат Хрватите, ракометарите на Загреб ги претворил од „зетовци“ во „бараби“.