Се повеќе мажи на возраст од 40 до 50 години се одлучуваат за естетска хирургија за подмладување благодарение на „Саркозиевиот синдром“, наречен по името на францускиот претседател Никола Саркози, кој по втор пат се ожени со  многу помлада жена, покажуваат најновите медицински истражувања.

Само во првите три месеци од годината, за 57 отсто пораснал бројот на мажите – пациенти во Велика Британија кои побарале лекарско мислење за ботокс инјекциите, што е драстичен скок во споредба со првото тримесечје на 2007 година, оценува британското медицинско здружение „Haley“.

Бројот на мажите кои направиле пластична операција за намалување на градите пораснал за 42 отсто, додека 43 отсто се зголемил бројот на припадниците на посилниот пол кои направиле микродермоабразија (обновување на горниот слој на кожата), покажуваат статистичките податоци.

За драстичниот пораст на машката пластична хирургија, според лекарите,  заслужен е  „Саркозиевиот синдром“.

„Хирурзите заклучиле дека повеќето мажи се одлучуваат за естетска хирургија бидејќи нивната новата партнерка е многу помлада, а тука е Саркозиевиот синдром кој се однесува на брак со 10 до 20 години помлада жена“, вели Лиз Дејл, предводник на научното здружение.

Новата сопруга на францускиот претседател Карла Бруни е тринаесет години помлада од педесет и тригодишниот Саркози.

„Мажите најчесто бараат пластична хирургија поради брчките околу устата и на челото, кои им ги откриваат нивните години“, изјави лекарот Џулијан Нортовер.

(Д.Т)