Во Шпанија годишно се изведуваат околу 400.000 пластични операции во козметички цели. - Околу 40 отсто пластични операции се изведуваат на луѓе помлади од 21 година. - Најчесто се оперира носот, се изведува лифтинг на лицето, липосукција, зголемување на градите и намалување на стомакот


Во Шпанија годишно се изведуваат околу 400.000 пластични операции во козметички цели, повеќе од било која друга европска држава.

Пластичната хирургија не се користи само за подмладување, туку се повеќе ја користат младите за да постигнат идеал на што поубав изглед, кој денес стана императив на модерниот живот.

Пластичната хирургија повеќе не се користи за да се подобри природниот изглед, туку на луѓето да им го промени изгледот, намерно да ги направи извештачени лица.

Неодамна принцезата Летиција (35), сопруга на престолонаследникот, принцот Фелипе, го оперираше својот нос и значително го промени својот изглед. 

Младите девојки просто се побудалени за зголемување на градите и многу од нив не сакаат да изгледаат природно, туку бараат градите да им бидат непропорционално поголеми во однос на телото, наведуваат пластичните хирурзи.

Принцезата Летиција

Истовремено, латиноамериканските и азиските емигранти одат на операција за да ги прилагодат своите црти на лицето според западните стандарди.

- Постојаното бомбардирање на нашите сетила со убави лица преку медиумите е нешто сосем ново во историјата на човечкиот вид, изјави за дневникот „Паис“ медиумскиот експерт Урлих Ренц.

Во минатото, убавината беше нешто несекојдневно, но со напредокот на козметичката техника и потрошувачкиот менталитет, со жесток притисок од медиумите, убавината стана императив, нешто што мора да го имаат и оние на кои природата не им дарила убавина, наведуваат шпанските аналитичари.

Бројот на пластичните операции во Шпанија годишно расте за 10 отсто, а во овој бизнис во текот на една година се вртат околу 800 милиони евра.

Околу 40 отсто пластични операции се изведуваат на луѓе помлади од 21 година. Најчесто се оперира носот, а многу често се врши лифтинг на лицето, липосукција, зголемување на градите и намалување на стомакот.
 Операциите воопшто не се ефтини, но големите компании ги нудат со агресивна реклама и на кредит.

Шпанците практикуваат и „скалперски туризам“ во Мексико, Колумбија, Бразил или Аргентина, каде не постои силна медицинска контрола.

Кралската палата наведе дека принцезата Летиција направила пластична операција затоа што имала проблеми со дишењето, но коментаторите овој потег го поврзаа со нејзиниот изглед.

- Мислев дека таа е жена со самодоверба, но таа не беше задоволна со нејзиниот изглед, смета Хаиме Пењафиел, новинар кој ја следи активноста на кралското семејство.

Една американска студија покажа дека луѓето кои се подложуваат на пластични операции не мора задолжително да имаат комплекс на пониска вредност. 

Меѓутоа, денес убавината се смета за нешто неопходно, неизбежно и вештачко, па многу хирурзи себе се опишуваат како магионичари на човечкото тело. 

Вградувањето на силикони во градите стана „нормален комерцијален производ“, па на вакви операции се одлучуваат дури и 14 годишни девојчиња.

Меѓутоа, проблемот е во тоа што овие девојчиња се препуштени на милост и немилост на пластичарите, што може да биде опасно кога се знае дека некои не ги почитуваат правилата на игра кои им ги наложува нивното еснафско здружение, туку им е важно само да земат пари.

Во денешно време важи правилото: медиумите определуваат кој е убав а кој не е, па сите луѓе - а посебно младите, по секоја цена сакаат да влезат во категоријата на убавите.

(Танјуг - Белград)