На неодамнешниот саем за автомобили во Франкфурт, Kia освен стандардната Optima, изложи и GT верзија на оваа лимузина, чие доаѓање на европскиот пазар се очекува да биде идната година. Со тоа, Optima ќе стане втор GT модел на Kia, по фамилијарниот модел Cee’d/Pro_cee’d GT од 2013 година.
Во споредба со стандардната Optima, GT верзијата визуелно се разликува по дизајнот на браникот, фелните, задните дифузори и двете издувни цевки, како и по аеродинамичните додатоци на праговите. Од Kia објаснуваат дека внатрешноста на моделот се темели на квалитетни материјали, достапни во стандардна верзија, но со детали кои му даваат на возилото спортски карактер.
За погонот одбран е 2.0 литарски T-GDI турбо бензински мотор. Познато е дека моторот има капацитет да развие 245КС и брзина од 240км/час.
На саемот е прикажан прототип, а љубителите на Kia ќе може да уживаат во возењето на овој модел во 2016 година.