Компанијата DeLorean Motor ќе го „воскресне“ автомобилот кој беше една од главните „ѕвезди“ во Back to the Future (Враќање во иднината) трилогијата од 80-тите.
Благодарејќи на нов закон донесен од американската влада (со кој се дозволува low-volume производство), компанијата DeLorean Motor по цели 34 години повторно ќе почне да го произведува овој автомобил, поточно моделот DMC-12 (кој им бил и единствен модел), најпознат по неговата „улога“во Back to the Future трилогијата од 80-тите. Досега, компанијата преживувала со санација на старите DeLorean-и (некои 9000, колку што биле продадени), сопственост на разни ентузијасти.
Инаку, оригиналната компанија била формирана во 1975-та од John DeLorean, но банкротирала во 1982-ра, и покрај напорите на John да ја спаси со пари добиени од шверцување на дрога. Во 1995-та, механичарот Stephen Wayne ја основал DeLorean Motor, а потоа ги купил сите преостанати делови и логото од оригиналната компанија.
Оригиналниот модел користел V6 мотор на Renault, но не се знае што новиот модел ќе користи. Компанијата планира да додаде и подобри кочници и амортизација за да го направи автомобилот подобар за возење на модерните патишта. Планот е да се прават околу 4 нови автомобили месечно, кои би чинеле близу $100 000, а би се појавиле на пазарот во почетокот на 2017-та. Колку за споредба, санираните стари модели чинат од $45 000 до $55 000.