Стартап компанијата Techrules од Пекинг претстави два концепти на спортски автомобили кои се дури предобри да би биле вистинити (и да некогаш се произведуваат сериски)
Моделите се наречени AT96 и GT96, и двата се електрични возила со турбинско полнење. АT96 користи керозин (авионско гориво) и е наменет за тркачки патеки, додека GT96 користи биогас или природен гас и е наменет за обичните патишта. Според тврдењата на компанијата, хибридните мотори вградени во овие автомобили се способни да поминат над 2000км со 4л гориво.
Овие ѕверови од автомобили ги движат вкупно 6 електрични мотори – по еден на секое од предните тркала, и по два на секое од задните. Вкупната нивна моќност изнесува неверојатни 1030 коњски сили, а забрзувањето од 0-100 е за 2.5 секунди. Вградениот електронски ограничувач ја лимитира максималната брзина на 350км/ч, а максималната километража со едно нивно полнење е над 1700км.
За сето ова да е возможно (доколку и навистина е возможно во моделите кои масовно би се произведувале), системот користи микро-турбини кои се вртат со 96000 вртежи во минута и произведуваат 36 kW од кои 30 одат за напојување на генераторот и 20 kWh lithium-manganese-oxide батеријата, додека 6 kW се наменети за помошната опрема. Компанијата тврди дека автомобилите без батериите и моторите тежат само 100кг.
За сето ова да е уште поневеројатно, Techrules тврдат дека возилото не бара скоро никакво одржување, освен повремено менување на воздушниот филтер. Моментално прототипите се тестираат на патеката Silverstone, а дали воопшто (и кога) некој од овие модели би се појавил во сериско производство, уште не се знае.