Tesla официјално ја претстави усовршената верзија на Model S, која ќе почне да се произведува веднаш. Бидејќи Tesla не користат години во описот на моделите, не се работи, на пример, за верзија Model S 2016, туку за апдејт на моделот, како што тоа го прават софтверските компании.
Дел од подобрувањата се само визуелни, но неколку се и технички.
На пример, основната верзија доаѓа со полнач од 48amp (наместо од 40), што е исто како и стандардниот во Model X. Според Tesla, автомобилот побрзо се полни кога е вклучен на полнач со поголема ампеража.
Како опција сега се нуди и полнач од 72amp, а доплатата за него изнесува $1500.
Новата верзија на Model S од Model X ќе го наследи и HEPA системот за филтрирање, што ќе овозможи исклучително прочистен воздух внатре во автомобилот, иако се поставува прашањето дали филтрирање со интензитет на заробување на воздушни патогени е воопшто потребен во едно возило.
Естетски, најголемата разлика е во дизајнот на предницата кој сега е во стил на Model X, и најверојатно продукциската верзија на Model 3 (чиј што скоро претставениот прототип ја нема предната маска со Tesla логото). Новитет е и понудата на два нови дизајни за дрвото во внатрешноста, наречени „Figured Ash” и „Dark Ash”. Најавени се и OTA (over-the-air) софтверски надоградувања кои ќе донесат дополнителни промени, веднаш штом ќе се на располагање.