Минатогодишниот скандал со лажирањето на дизел емисиите од страна VW Group беше голем удар врз нивната репутација и довербата на клиентите. Затоа, Volkswagen сега има план да заштедува 1 милијарда евра годишно, притоа посветувајќи се на електромобилноста и на новата генерација на „чисти“ дизел мотори.
Дел од тој план е и следната (8-ма) генерација на Golf, иако сегашниот модел треба да добие мал „фејслифт“ во текот на годинава. Golf Mk8 ќе биде базиран врз подобрениот модел од 7-мата генерација (ќе се држи до MQB платформата) , но ќе биде попрактичен, помоќен, и што е најважно, поекономичен.
Според сознанијата на Auto Express, новиот Golf ќе биде помеѓу 35kg и 70kg полесен отколку сегашниот модел, и како и новиот Tiguan, ќе биде понизок и поширок. Се очекува во просторот во внатрешноста да се зголеми, како и да бидат вметнати иновации како контрола со гестови и TFT командната табла од VW Passat.
Во поглед на дизајнот, Mk8 ќе го прати моделот на еволуција на претходните Golf-ови – ќе го има специфичниот препознатлив„Golf-овски“ дизајн, со паметни LED фарови и поостра и подефинирана предна решетка, а се очекува и редизајнирана задница. Во ентериерот се очекуваат подобрувања на материјалите од кои што ќе биде изработен, поточно зголемена употреба на метали, кожа и висококвалитетна пластика за која, на пример, ќе се користи специјален пигмент кој апсорбира помалку топлина, со што ќе се редуцира потребата за користење на клима.
Со овој модел, VW ќе претстави серија на супер-ефикасни 3-цилиндрични 1.5 литарски TDI дизел мотори, од 75 до 121 коњски сили, со емисија на CO2 помала од 85g/km. Моторите ќе бидат модуларни, така што со додавање на цилиндри од 500cc , VW ќе можат да развијат поголеми и помоќни мотори како 3.0 литарски V6 дизели, кои би се вградувале во моделите како идниот Touareg SUV.
На пазарот (во 2018) прво ќе се појави hatchback верзијата на Golf Mk8, а подоцна и караван и спортските GTI, GTD и R верзиите. Сè уште нема план за кабриолет модел, а доколку тој се појави тоа најверојатно нема да се случи пред 2020-та.