Според Google, една од работите со кои што автономните автомобили би се направиле уште побезбедни е адхезивната технологија – тие сметаат дека поставување на „леплив“ слој на предницата на ваквите автомобили, кој во случај на колизија со пешак би ја намалил штетата или повредите предизвикани доколку тој биде фрлен врз други возила или објекти. е одлична идеја , поради што и ја патентирале.
Според описот на патентот кој неделава бил одобрен на Google, адхезивната обвивка на предницата на возилото би се активирала со контакт и (скоро) инстантно би била способна буквално да го залепи пешакот за неа, не дозволувајќи му понатамошни повреди кои потенцијално би се случиле доколку тој би бил фрлен од ударот, или доколку падне под тркалата на самото возило кое го удрило. Доколку, пак, пешакот е повреден од самиот удар, оваа техника би го имобилизирала со што исто така би се спречиле дополнителни повреди - на пр. доколку му е скршена ногата, тој ќе остане залепен на возилото додека шоферот не го запре и му укаже или повика помош, наместо да падне/стапне на неа и да ја влоши повредата.
Технологијата е дизајнирана првенствено за автономните возила, но би можела да се аплицира и на било кое „обично“ возило.
Ова би била прва сигурносна мерка од овој вид вградена на надворешноста од било кој автомобил – досега, компании како Citroen или Jaguar имаат вградено уреди кои ја подигнуваат хаубата при удар (за да се ублажи неговиот ефект), додека некои други развиваат надворешни воздушни перничиња. Меѓутоа, никое од овие решенија (освен ова на Google) не нудат начин да се ублажи секундарниот удар на кој што има големи шанси да биде изложен пешакот.