Најновата замена за предводникот на луксузни saloon возила на Audi, моделот А8, ќе биде едно од технички најразвиените возила кои се појавиле на пазарот. Од Audi планираат во него да ги вградат нивните најнапредни технологии, така што ова ќе биде првото комерцијално направено возило со „Level 3” технологија за автономно возење, што значи дека автомобилот ќе ја има комплетната контрола, а возачот ќе може да одмори и воопшто и да не обрнува внимание на патот.
Дизајнот на A8 ќе биде инспириран од Prologue концептот кој беше претставен на LA Motor Show минатата година, кој меѓу другото се одликува со поистакната предна решетка и специфични задни светла (кои се забележуваат и на шпијунските фотографии, и покрај тоа што возилото е значително замаскирано)
Audi A8 ќе има вградено и нов електричен систем од 48v, сличен на оној кај новото Audi SQ7, кој ќе функционира и во обичните и во хибридните модели. Се очекува и plug-in хибридна верзија на A8, но не и сосема електрична – тоа Audi го „чуваат“ за друг нивни модел кој треба да е ривал на Tesla.
Револуционерниот систем за автономно возење ќе вклучува радарски сензори со голем домет, 12 ултрасонични сензори, ласерски скенери и видео камери во висока резолуција кои константно ќе ја набљудуваат околината околу возилото. Сето ова треба да му овозможи на системот безбедно да вози низ сообраќајот со брзини до 60км/ч.
Oд компанијата велат и дека работат на нов систем за контролирање на одредени функции на автомобилот со гестови (кој ќе биде вграден и во новиот VW Golf наредната година), како што се нагодување на температурата, одговарање на телефонски повици или менување на радио станици.