Кај новите модели на автомобили вообичаен дел од опремата се разните сензори кои ги анализираат објектите околу возилото и асистираат при паркирање, менување ленти, контрола на крстарењето и сл., а сега истражувачите веќе работат на сензори кои ќе ги следат движењата во ентериерот на автомобилот.
Иницијативата наречена „Интелигентен ентериер на возилата“, во оригинал „Intelligent Car Interior project” (InCarIn) се фокусира токму на она што се случува внатре во возилото, со помош на камери кои имаат перцепција на длабочината и можат да го снимаат ентериерот, да го идентификуваат бројот на патници, нивната големина и положба/држење.
Преку сето ова системот може да ги дедуцира нивните активности – на пример, ќе може на екранот кој што се наоѓа пред возачот да прикаже видео слика од задното седиште, за да тој не мора да се сврти и провери што прават децата позади (доколку забележи дека пробува да го направи тоа).
Системот исто така ќе ги анализира големината на телата и нивната позиција, со што ќе може да прави корекции за секој патник (во поглед на подесување на седиштата, појасите и сл.), како и да препознава што тој планира да прави и што држи во рацете.
InCarIn ќе биде тестиран во Volkswagen Multivan, а доколку се покаже корисен, овој систем на вештачка интелигенција може да стане интегрален дел од сите идни автономни возила.