Новото Audi A7 е забележано на шпијунски фотографии и иако е значително камуфлирано, сепак е видливо дека дизајнот нема да му е драстично сменет, туку дека ќе има суптилни визуелни промени во однос на сегашниот модел.
Најзабележителна промена е новата предна решетка и предни фарови, кои го имаат истиот стил како и новите TT и А5 модели, а променет е и изгледот на задните светла. Се очекуваат слични измени и во ентериерот, во кој ќе биде вграден новиот Virtual Cockpit систем на Audi.
Во поглед на моторите, иако изборот се очекува да биде помеѓу V6 и V8 варијанти од бензински и дизел мотори, кај моделот на овие фотографии не се забележува ауспух, што може да значи или дека се работи за невообичаен дизајн, или дека е можна електрична или plug-in хибридна верзија на овој модел.
Новиот А7 ќе ја користи MLB Evo платформата, истата од Q7 SUV моделот, дизајнирана да ја намали тежината на возилото – тоа значи дека се очекуваат подобрувања во поглед на потрошувачката, управувањето и перформансите. Колку за споредба, сегашниот 3.0 литарски TDI Ultra модел со 218 коњски сили има потрошувачка од 25km/l и CO2 емисии од 124g/km.
Новата генерација на Audi А7 се очекува на пазарот да се појави до 2018-та.