Автономно возило му го спасило животот

Што и да мислите за автономните автомобили, Џошуа Нели ќе ви каже нешто што ќе ви го промени мислењето за овој вид на превозни средства.

Тој пати од пулмонална емболија, а минатиот месец додека бил зад воланот на автомобилот Tesla Model X, му се слошило и не знаел што да прави. Во тој момент се сетил да го вклучи системот за самоуправување и да го насочи автомобилот кон најблиската болница.

- Беше многу страшно. И се јавив на жена ми и само и кажав дека нешто не е во ред и дека не можам да дишам. Губев здив и знаев дека морам да стигнам до болница, изјави адвокатот од Мисури.

Што се случило потоа, не се сеќава. Сепак, свесен е дека блокадата на неговите бели дробови можела да го убие. Според неофицијални податоци, речиси 1/3 од луѓето кои патат од оваа белодробна болест, не преживуваат. Но, имал среќа затоа што автомобилот на Tesla, кој го купил една недела пред да му се случи ова, му го спасил животот.