По неколкуте тизери кои го најавуваа изминатиов период, Vision Mercedes-Maybach 6 е конечно и официјално претставен.
Се работи за концептуално 2+2 купе со електричен погон, долго скоро 6 метри и кое кога ќе се појави на пазарот во 2017-та, ќе му конкурира на Rolls-Royce Wraith и на останатите суперлуксузни спортски модели.
Според официјалните детали, Maybach 6 има 750 коњски сили и домет со едно полнење на батеријата од 322km. Перформансите се подеднакво импресивни, од 0-100км/ч забрзвува за помалку од 4 секунди, а максималната брзина му е лимитирана на 250км/ч. Бидејќи батеријата брзо се полни, за само 5 минути може да се дополни со доволно енергија за дополнителни 100km, a на располагање е и опцијата за автономно возење.
Целиот дизајн е футуристички со огромните 24-инчни тркала, долгата предница и заоблениот заден дел, а ентериерот со неговата уникатност делува како да е 20 години пред времето.
Предниот дисплеј ги покажува сите навигациски податоци, како и оние од infotainment системот, а на стаклото од шофершајбната кое исто така служи како дисплеј се прикажани податоци поврзани со возењето.
Овој модел е модерна интерпретација на Maybach Excelero од 2004-та, кој пак е спортско возило со V12 мотор базирано на идеја за модерен луксузен автомобил во стил од 1930-тите. Maybach 6 ќе се наоѓа во класа над S-Class Coupe во фамилијата на Mercedes, а продукциската верзија која треба да се појави на пазарот наредната година се очекува да чини околу 277.000 евра.