Серијата на трки на автономни возила наречена Roborace го претстави Devbot – вистинско автономно тркачко возило (кое за жал не е со футуристички изглед како концептите кои досега се ширеа на интернет). Возилото ќе претставува основа за софтверот и хардверот, кој останатите тркачки тимови ќе го користат во сопствените возила.
Целта на Roborace е да го обезбеди секој тим со идентични возила, чија што единствена разлика ќе претставува софтверот и неговото кодирање од страна на тимовите. Devbot изгледа како традиционално тркачко возило и има вградено софистициран компјутер кој го управува – иако има и кабина со возачко седиште, за да доколку е неопходно, контролата да ја превземе човек. Од Roborace, пак, велат дека кабината е таму од друга причина – да им дозволи на тимовите комплетно да разберат како возилото се однесува кога е на патека.
Devbot го има истиот компјутерски систем и погон како и футуристичкиот Robocar концепт, дизајниран од Daniel Simon, кој ќе биде официјално претставен подоцна годинава. Автомобилот ќе има вградено импресивна технологија за автономно возење, многу пософистицирана од било кој „полу-автономен“ систем, кој се вградува во автомобили како што е Tesla Model S.
Devbot и Robocar користат голем број на lidar и radar сензори како и два GPS сензори на врв на возилото кои го позиционираат на стазата, додека „мозокот“ зад сето ова е Nvidia Drive PX 2 суперкомпјутерот.
Roborace трката ќе почне да се одржува подоцна годинава, како додаток на третата сезона од регуларните Formula E трки. Отсуството на возач значи дека возилата ќе имаат дополнителен простор за батерии, елиминирајќи ја потребата за нивно менување насред трка, како во Formula E.