Alfa Romeo го претставија моделот Giulia Veloce, кој ќе биде изложен на Paris Motor Show , и за кој ќе постојат две нови опции за мотор.
Купувачите ќе можат да бираат помеѓу 2.0 литарскиот turbo бензинец со 280 коњски сили (во споредба, стандардната Giulia има 200), и 2.2 литарскиот дизел кој ќе биде малку послаб со 210 коњски сили, што е пак значително повеќе од 180-те во стандардниот модел. Дизелот ќе има и поголем вртежен момент – 470Nm, во споредба со 400Nm на бензинецот.
И двата мотори ќе доаѓаат со 8-брзински автоматски менувач, како и нов погон на сите тркала кои Alfa го нарекуваат Q4. Системот се однесува како стандардниот погон на задни тркала поголем дел од времето, но доколку автомобилот почне да ја губи контролата, до 60% од силата на моторот ќе биде пренесена на предните тркала.
Од Alfa Romeo тврдат дека овој нов систем ќе и даде на Giulia најдобра контрола во нејзината класа, и дека нема негативно да влијае на потрошувачката и покрај тоа што во споредба со моделите со погон само на 2 тркала, Giulia Veloce е за околу 60kg потешка.
Во поглед на стилот, Veloce се разликува од „обичната“ Giulia по специфичните предни и задни браници, внатрешноста со спортски седишта од црна кожа и алуминиумски акценти на командната табла, централната конзола и вратите. Ќе биде понудена и нова боја – Blue Misano, прикажана на сликите.