Компанијата Rinspeed традиционално претставува концептуални возила на CES (Consumer Electronics Show), а на CES 2017 тоа ќе биде моделот Oasis – електричен автомобил кој ќе има способност да вози автономно.
Oasis е наменет за градските средини и нуди одлично маневрирање благодарејќи на можноста за управување со задните тркала.
Екстериерот му е изработен претежно од стакло, со соларен панел на кровот, додека предните тркала се комплетно покриени. Од Rinspeed велат дека изгледот на возилото потсетува на роботот R2-D2 од филмовите Star Wars, но искрено таа „сличност“ и не е претерано забележлива.
Ентериерот е она по кое што овој концепт се двои од сличните. Тој е инспириран од изгледот на вообичаените дневни соби во домовите, а таков е затоа што според дизајнерите, треба да нуди малку поинакво искуство од она во традиционалните автомобили. Во Oasis има комфорни столици со наслони за рацете, телевизор, како и малечка градина во предниот дел. Големата шофершајбна истовремено функционира и како екран за augmented и virtual reality технологите. Иако може да вози автономно, внатре има и мултифункционален волан.
Концептот е исто така наменет за делење на возилото, поради што во него има вградено простор за товар кој може да се грее или лади. Идејата на Rinspeed е дека возачите можат да одат со автомобилот до работа или до дома, и потоа да го предадат, на пример, на некој доставувач кој ќе го користи за испорака на пакети или храна.