Aston Martin го претставија новиот Vanquish S, помоќен со поагресивен изглед и ревизии на менувачот и амортизацијата.
Во новиот модел е вграден истиот 6-литарски V12 мотор како и во стандардниот Vanquish, со тоа што е нагоден да има 27 коњски сили повеќе – значи вкупно 603. Ова му помага на Vanquish S да постигне забрзување од 0-100км/ч за само 3.5 секунди, а максималната брзина му изнесува 323км/ч.
Иако „на хартија“ подобрувањето на перформансите се делува премногу големо, компанијата тврди дека новиот мотор нуди пожестока реакција при стискање на педалата за гас, како и пренос на моќноста, благодарејќи на редизајнираните отвори за пропуштање на воздух во моторот.
Подобрен е и 8-брзинскиот Touchtronic III менувач, за кого од Aston велат дека побрзо ги менува брзините отколку оној на стандардниот Vanquish, како и амортизацијата.
Сите овие механички подобрувања се скриени под каросеријата со поагресивен изглед, и експонирани акценти од carbon-fibre материјалот.
Понудени се и стилски надградби од типот на 20-инчни бандажи кои можат да имаат црн или сребрен финиш, како и кров, предна решетка и детали на хаубата изработени од carbon fibre. Во поглед на ентериерот, може да се одберат неколку опции од новата Filograph ватирана кожа, а централната конзола може да има финиш во, погодувате – carbon fibre материјалот со сатенска текстура.
Првите испораки на Aston Martin Vanquish S се очекуваат при крајот на декември, а ќе чини од 230 000 евра нагоре.