На LA Motor Show 2016 Volkswagen ја претставиле најновата верзија на e-Golf, комплетно електричната варијанта на нивниот најпознат модел, која во однос на старата нуди повеќе домет, поголема моќност и повеќе опрема.
Дизајнот е идентичен како на најновата ревизија на Golf моделите, со LED предни и задни фарови, дневни светла, нов дизајн на задниот браник, нов дизајн на светлата за кочење, како и анимирани индикатори.
Дометот на новиот e-Golf е зголемен за околу 50%, и тој сега изнесува 300 километри со едно полнење на батериите, додека моќноста е зголемена на 135 коњски сили, за околу 20 повеќе отколку претходниот модел. Зголемен е и вртежниот момент (за 20Nm), кој сега изнесува 290Nm, што на автомобилот му овозможува забрзување од 0-100км/ч за 9.6 секунди.
Од Volkswagen велат дека потрошувачката на електрицитет не е променета и покрај зголемената моќност, а поголемите батерии ќе му овозможат на возилото да поминува поголема километража со едно полнење.
Покрај останатите подобрувања превземени од „обичниот„ нов Golf, e-Golf сега има дигитална инструмент табла, и контрола на infotainment системот со гестикулации. Како стандардни опции сега доаѓаат e-remote сервисите, кои му овозможуваат на сопственикот безжично (преку апликации) да ги контролира климата и електричното полнење.
Цената на новиот e-Golf се очекува да биде околу 37 400 евра, без грантот кој владите во многу земји го даваат при купување на електрични возила.