Урбаниот јавен транспорт (како таксијата, автобусите и сл.) се користи за пренесување на илјадници патници секој ден, и наскоро ќе биде комплетно автономен. Уште од сега многу градови, превозни сервиси и производители на автомобили ги тестираат своите роботски автономни возила кои би можеле да го револуционизираат јавниот превозен систем, а еве дел од нив:
1) LUTZ
Овие малечки електрични возила се дизајнирани да ги транспортираат луѓето со мали брзини помеѓу железничките станици и централните градски подрачја, а од 2015-та се тестираат во градче во Обединетото Кралство, и тоа во мануелен мод со обучен оператор. По оваа фаза ќе следи автономната, што ќе кулминира со финална демонстрација пред да почнат да се користат насекаде.
2) Urban Light
Овој систем на четвороседи е почнат да се користи во 2011-та, на рута долга 3.9 километри која го поврзува аеродромот Хитроу со неговиот паркинг. Моментално тој со состои од 21 возило кое може да се движи автономно, преку централна контрола. Официјалните лица од аеродромот сакаат да го прошират овој систем кон блиските хотели, користејќи 400 возила.
3) WEpod
WEpod е првиот автономен електричен шатл за користење на јавни патишта и за прв пат е тестиран годинава со превезување на 6 патници на рута долга 200 метри. Доколку сите тестирања поминат според планираното, тој ќе превезува патници помеѓу два града во провинцијата Гелдерланд во Холандија.
4) nuTonomy
Стартап компанијата nuTonomy го претстави првото автономно такси минатиот август. Во тест фазата која се одвива во населено место во Сингапур со површина од 6.5 квадратни километри се користат 6 такси возила (кои до крај на годината ќе се зголемат на 12) – модифицирани модели на електричните Renault Zoe и Mitsubishi i-MiEV.
5) Uber
Uber флотата на автономни возила сега засега се состои од модифицирани модели на Ford Fusion, а тест програмата е започната овој септември. Во почетната фаза сè уште во возилата има возач и инженер, но се планира секое од планираните 1.5 милиони возила да бидат комплетно автономни кога официјално ќе почнат да возат ширум светот.
6) Robot Taxi
Токио, градот домаќин на Олимписките игри во 2020-та, веќе се припрема за таа улога со тестирање на стотици автономни таксија кои треба да ги пренесуваат атлетичарите и посетителите. Проектот е наречен Robot Taxi, а уличните тестирања се надгледувани од компанијата DeNA.