Bentley се спремаат да ја лансираат сосема новата верзија на нивниот Continental GT модел подоцна оваа година, но во меѓувреме сегашниот модел ќе ја добие најмоќната продукциска верзија која компанијата било кога ја направила – новата Supersports варијанта.
Од Bentley велат дека новиот Continental GT Supersports ќе биде најбрзиот четворосед во светот – на располагање ќе биде во нормална и кабриолет варијанта, ќе има 6.0 литарски W12 бензински twin-turbocharged мотор од 710 коњски сили и 1017Nm вртежен момент, кој од 0-100км/ч ќе забрзува за само 3.4 секунди – побрзо отколку било кој Bentley модел досега. Возилото ќе тежи 2.3 тона (кабриолетот ќе биде 150kg потежок поради дополнителниот механизам за подвижниот кров), а максималната брзина ќе му биде 336км/ч.
Новиот модел ќе го задржи погонот на сите тркала од сегашниот Continental, со тоа што 60% од вртежниот момент ќе биде доделен на задните тркала. Останатите подобрувања ќе се однесуваат на системот за амортизација кој ќе биде по крут и спуштен, кочниците ќе бидат јаглеродно-керамички, а како опција ќе биде понуден и титаниумски систем за издувни гасови кој би бил неколку килограми полесен од класичниот.
Bentley Continental GT Supersports ќе биде околу 60 000 евра поскап од сегашниот „обичен“ модел, со почетна цена од околу 250 000 евра за купе и 272 000 евра за кабриолет моделите. Првите испораки се очекуваат оваа пролет.
