Audi на Detroit Motor Show го претстави Q8 концептот - предводникот во нивната серија на SUV модели кој ќе се придружи на останатите во 2018, и ќе биде ривал на BMW X6, Mercedes GLE Coupe, како и на Range Rover.
Концептот е сличен на сегашното Audi Q7 – долг е над 5 метри и има меѓуоскино растојание од 3 метри, но е за 4cm понизок од Q7, и има багажник од 630 литри. Прикажаната верзија има 4 седишта, но се очекува продукцискиот модел да има 5.
Концептот бил прикажан како plug-in хибриден e-tron модел, напојуван од 3.0 литарски TFSI мотор спарен со електричен мотор напојуван од 17.9kWh моќна литиум-јонска батерија. Комбинираната моќност од двата мотори е 445 коњски сили и 700Nm вртежен момент, додека CO2 емисиите се 53g/km.
Од Audi велат дека забрзувањето од 0-100км/ч на новата Q8-ца ќе изнесува 5.4 секунди, а максималната брзина ќе биде 250км/ч. Q8 ќе доаѓа со 8-брзински автоматски менувач и quattro погон.
На прикажаниот модел може да се забележи поширока верзија на предната осмоаголна решетка, додека на задниот дел има лента од LED светла по целата широчина, што ќе биде заштитен знак кај сите идни e-tron модели.