Skoda ја претставија најновата варијанта на нивниот нов Kodiaq, наречена Kodiaq Sportline, која нуди нови стилски подобрувања поради кои отскокнува од останатите стандардни верзии од овој SUV модел на Skoda.
Предната радијаторска решетка, шините на покривот, ретровизорите и рабовите на страничните прозорци се со црн финиш, додека задниот прозорец како и прозорците кај патниците се затемнети. Како стандардна понуда доаѓаат 19 инчни алуминиумски бандажи, а како дополнителна опција ќе се нудат и поголеми, 20 инчни.
Во внатрешноста тапацирот со Алкантара штоф ќе биде стандарден, како и кожниот волат и алуминиумските педали. Спортскиот стил на кокпитот продолжува и на шоферскиот дисплеј, на кој има G-Force мерач.
Во стандардната понуда кај Sportline моделот се вклучени: прилагодливо LED амбиентално осветлување, тачскрин infotainment систем, како и пакет за асистирање на возачот кој вклучува асистенција при закачена приколка, детекција на слепа точка, асистенција при паркирање со помош на камери, како и автономно кочење во итни случаи. Како опција ќе биде понудена адаптивна контрола на динамичката шасија, која вклучува и спортско нагодување на амортизерите.
Изборот на мотори го дели со скоро претставениот модел Kodiaq Scout – понудени ќе бидат 1.4 литарски бензинец од 150 коњски сили, како и 2.0 литарска верзија од 180, како и два 2.0 литарски TDI дизел мотори од 150 и 190 коњски сили. Стандардна опција ќе биде погонот на сите тркала.
Како и новата Scout варијанта, и Sportline ќе дебитира на Geneva Motor Show во март, кога ќе се знаат повеќе детали, како и цените.