BMW на Shangai Motor Show лансираше помоќен, полесен и побрз M4 , чие производство ќе биде лимитирано на 2 години, а продажбата ќе започне подоцна годинава со цени почнувајќи од 105 000 евра.
Според компанијата, она што ќе го двои CS од обичниот M4 е карактерот инспириран од мотоспортот.
BMW M4 CS го има истиот 3.0 литарски twin-turbo мотор, но со зголемена моќност од 460 коњски сили. Како резултат на тоа, забрзувањето од 0-100км/ч е за 3.9 секунди, додека најголемата брзина е електронски лимитирана на 280км/ч. Погонот е на задните тркала, преку 7 брзински менувач.
Покрај зголемената моќност, BMW го има адаптирано и системот за суспензија за да ја подобри динамичката моќ во однос на стандардниот M4, како и искористено разни техники за намалување на тежината на CS верзијата. Користена е пластика зајакната со јаглеродни влакна, поради што автомобилот е за 32кг полесен од M4, и тежи 1580кг.
Во поглед на стајлингот, BMW M4 CS има малечки детали кои го двојат од обичниот модел. На предницата има нов, поизразен преден сплитер, како и нов спојлер на задниот дел.
Уникатните алуминиумски бандажи со 10 краци се финиширани во сива боја, а понудени се и две бои за автомобилот – металик San Marino Blue и металик Lime Rock Grey.
Во внатрешноста, BMW имаат употребено комбинација од кожа и Алкантара, на командната табла се вметнати CS беџовите, а на располагање се и нови спортски седишта. Стандардната опрема ги вклучува системите за навигација и автоматска контрола на климата.