Најновиот SUV на Hyundai наречен Kona е фатен од фотографските објективи пред неговото официјално претставување летово, откривајќи некои стилски карактеристики.
Фотографијата од данскиот магазин AutoWeek го покажува профилот на Kona и контрастните бои на каросеријата. Големите испакнати лакови над тркалата се покриени со црна пластика, а на задниот дел се „претопуваат„ со светлата.
Големите алуминиумски бандажи со црни акценти му даваат спортски изглед на овој модел, а целиот дизајн на готовиот продукт е скоро идентичен со оној кај маскираниот прототип фатен на шпионски фотографии пред неколку недели.
Кога ќе се појави на пазарот оваа есен, Kona ќе биде најмалиот SUV модел на Hyundai, наоѓајќи се под Tuscon и Santa Fe моделите.
Името, инаку, е референца на областа Кона на островот Хаваи. Новиот модел најверојатно ќе биде базиран врз шасијата на постоечкиот i20, кој е стар само 2 години и ќе ги добие најновите мотори од i30 – 1.0 литарскиот 3-цилиндричен и 1.4 литарскиот 4-цилиндричен турбо бензински мотори, како и 1.6 литарскиот дизел во најмалку 2 варијации на моќност.