По подновувањето на моделот 500 пред неколку години, Fiat сега вниманието го врти кон неговиот „поголем брат“ 500L. Мини MPV-то (multi-purpose vehicle/возило со повеќе намени) на Fiat во 2017 добива подновен изглед и дополнителна технологија, а продажбата треба да започне подоцна годинава.
Ревизиите на екстериерот се суптилни – браниците, предната решетка и стилизираните дневни LED светла се позајмени од 500-ката, а додадени се нови светла за магла, додека изборот на бои е зголемент на 37 комбинации.
Покрај тоа, целата серија е преименувана со 3 варијанти – The Urban (слична на сегашниот модел), The Wagon (ново име за подолгата верзија со 7 седишта) и The Cross (поранешно име Trekking) - верзијата со зајакната каросерија, зголемена висина за 25mm и систем за контрола при спуштање од ридчиња.
Во внатрешноста на 500L сега се наоѓа нов мултифункционален волан, централен TFT дисплеј, и кај најскапите модели, 7-инчниот Uconnect HD Live навигацискиот систем на Fiat со Apple CarPlay и Android Auto конективност. Вклучен е и новиот централен потпирач за раце, амбиентално осветлување и поквалитетни материјали со нови избори на бои.
Подобрена е и безбедносната технологија со автономно кочење во итни случаи, додека задната камера ќе се имплементира подоцна во 2017-та.
Во поглед на моторите, изборот ќе биде помеѓу 1.4 литарски бензински мотор во не-турбо варијанта од 95 коњски сили, или T-Jet Turbo од 120 коњски сили. Карактеристичниот 0.9 литарски Twinair мотор на Fiat со 2 цилиндри ќе биде понуден во варијанта од 105 коњски сили, додека дизелите ќе бидат 1.3 литарски од 95 и 1.6 литарски од 120 коњски сили.