Volkswagen и официјално ја претставија најновата, 6-та генерација на моделот Polo. Со позрел дизајн, зголемени димензии и избор од нови мотори, новото Polo ќе им биде ривал на Ford Fiesta и SEAT Ibiza кога ќе почне да се продава подоцна годинава.
Поминати се дури 8 години откога сегашното Polo се појави на пазарот, па така новиот автомобил е направен врз најновата платформа за малечки автомобили на VW-Group напречена MQB A0, која ја дели со новата Ibiza и идните верзии на Audi A1 и Skoda Fabia
Новото Polo е „пораснато“ во секој поглед освен висината – долго е 4053мм (за 81мм повеќе од сегашното), што е скоро исто како 4-тата генерација на Golf од 90-тите. Од сегашниот модел е пошироко за 69мм, и има 94мм поголемо меѓуоскино растојание, што значително го подобрува просторот за патниците. Волуменот на багажникот е пораснат од 280 на 351 литри, а овојпат Polo-то ќе се продава само во верзија со 5 врати.
Освен поголемиот простор во кабината, значително е подобрен и нејзиниот квалитет и вградената технологија. Во неа доминира новиот touchscreen infotainment систем чија големина (во зависонст од тримот) варира од 6.5 до 8 инчи, а тука е и најновата верзија на Active Info Display-от (понова дури и од онаа кај последниот Golf MK7.5).
Поскапите модели ќе доаѓаат со амбиентално осветлување како и избор од 13 бои за тримот на командната табла.
Изборот на бензински мотори ќе вклучува 1.0 литарски од 65 коњски сили, два 1.0 литарски турбо мотори од 96 и 115 коњски сили, како и поголем 1.5 литарски турбо од 150 коњски сили кој ќе има опција за деактивирање на цилиндрите за заштеда на гориво. Дизел моторите ќе бидат во две 1.6 литарски TDI варијанти од 80 и 95 коњски сили, а истовремено ќе биде понуден и Polo GTI моделот кој ќе има поголем 2.0 литарски TSI турбо бензински мотор од 200 коњски сили.
Во зависност од моделот, на располагање ќе бидат 5 или 6 брзински мануелни менувачи и 7 брзински DSG автоматски менувач.
Цената на основниот модел ќе започнува од околу13 000 евра, а ќе доаѓа со 14-инчни алуминиумски бандажи, лимитер на брзината, како и системи за итно сопирање при гратско возење и детекција на пешаци. Поскапите модели ќе имаат и адаптивна контрола на крстарењето, целосни LED предни фарови, прилагодливи амортизери, како и панорамски сончев кров.