Honda најавија дека сосема новата 10-та генерација на нивниот познат модел Accord ќе дебитира во Детроит на 14-ти јули, а заинтересираните ќе можат преку streaming да го гледаат настанот во живо на официјалната YouTube страница на Honda.
Компанијата ветува дека новиот модел ќе се фокусира на подобра динамика при возењето, повеќе префинетост и подобра потрошувачка на гориво. За жал, тоа ќе значи и отфрлање на саканиот но слабо продаваниот модел со V6 мотор, но затоа пак таа празнина ќе ја пополнат два нови турбо мотори.
Целосниот изглед на автомобилот сè уште не е објавен освен делумно на тизер сликата, а раниот прототип кој новинарите од порталот AutoBlog имале прилика да го тестираат во Јапонија бил камуфлиран. Тест моделот имал 2.0 литарски турбо мотор со 4 цилиндри кој, иако помалку моќен во споредба со V6 моторот, се покажал исклучително потентен, а бил ослабена верзија на моторот од новата Honda Civic Type R.
На располагање ќе бидат 3 менувачи и тоа 6-брзински мануелен, CVT, и сосема нов 10-брзински автоматски развиен од Honda. Подоцна се очекува да се појави и хибриден модел.
Повеќе информации за новата Honda Accord ќе се знаат како што се ближи датумот на промоцијата.