Мистериозно ново електрично возило со Volkswagen беџ било презентирано на Future Mobility Days настанот организиран од VW Group во Германија.
Наречен Gen.E, овој модел со големина на Golf бил прикажан на неколку официјални фотографии, но од компанијата велат дека не се работи за ново концепт возило, туку за „истражувачко“ возило направено за тестирање и демонстрирање на новите технологии за брзо полнење на батериите.
Според портпаролот на Volkswagen, Gen.E се користи „исклучиво за да ги прикаже инженерските развивања и достигнувања“
Како таков, Gen.E Моментално се користи за прикажување на најновата технологија на VW Group – мобилни роботи за полнење. Тие се движат автономно, и се дизајнирани за користење во подземни и повеќекатни гаражи. Gen.E се приклучува на роботот за полнење, кој е доволно моќен да му овозможи на возилото домет од над 500км – иницијалната цел која компанијата ја има поставено за нивните електрични возила со I.D беџот.
Иако фокусот е на технологијата, а не на автомобилот, од VW велат дека Gen.E е направен врз лесна архитектура дизајнирана за максимална безбедност во случај на удар, а официјално не се споменува MEB електричната платформа на компанијата.
Во поглед на дизајнот, Gen.E е хечбек модел со 3 врати и аглест дизајн – предницата е инспирирана од Golf моделот, а дневните светла се слични на оние од последниот e-Golf.
Со оглед на мистериозното претставување на возилото, тешко е да се шпекулира дали Gen.E прикажува некој од идните модели на VW или пак е мал увид во дизајнерскиот јазик на идната генерација на VW автомобилите – иако делува малку претерано инженерите да дизајнирале ново возило комплетно „од нула“, само за да ги демонстрираат роботите за полнење.
Возможно е елементите и дизајнерскиот јазик од Gen.E моделот да ги видиме во некои идни концепти на VW, или пак во нивни продукциски модели.