Моментално постојат одредени возила со софтвер за автономно возење, но колку и да се усовршени, сè уште немаат автономија од 5-то ниво, која е резервирана за вистински автономните системи. Шведската стартап компанија Einride има за цел да го постигне тоа, и развиле прототип на возило кое е комплетно автономно.
T-Pod е електричен камион наменет за превоз на роба на долги дестинации. Приколката е со должина од над 7 метри, и има простор за товар но не и за кабина за човечки возач или оператор – во дизајнот изостануваат педалите, воланот и шофершајбната од класичните камиони. T-Pod може да биде контролиран далечински од човечки оператор, или да се движи комплетно слободен од било каква човечка контрола.
Целта на компанијата е да создаде комплетен транспортен систем помеѓу шведските градови Гетеборг и Хелсингборг, и прв активен систем кој ќе покрива капацитет од пренос на 2 милиони палети товар годишно.
Прототипот кој бил претставен на еден политички настан ќе биде тестиран оваа година, и доколку сè помине во најдобар ред, наскоро по тоа ќе може да започне интернационалната дистрибуција.