Во почетокот на годината Ford ја претставија подновената верзија на 2016 Kuga, а сега следи и продукциската верзија на Kuga Vignale која во продажба треба да се појави подоцна годинава.
Под-брендот на Ford, Vignale, моментално е лимитиран само на моделот Mondeo, а сега ќе следат и Kuga, Edge и S-MAX.
Како и кај Mondeo-то, и кај овој модел има доста хром, како и нова темен матиран шестоаголен дизајн на предната решетка со темни сјајни детали, и 19 инчни алуминиумски бандажи.
Во внатрешноста е употребена Windsor кожа со уникатен крој, како и нова трим боја „Кашмир“. Во Kuga Vignale е вградена и активната контрола на бучавата (Active Noise Control), која низ звучниците ги елиминира несаканите звуци од надвор.
Ford Kuga Vignale ќе се нуди со неколку мотори, и тоа 1.5 литарски Ecoboost бензински со 150 коњски сили, и со 180 коњски сили, обата со автоматски менувач и погон исклучиво на сите тркала. Тука е и 2.0 литарскиот TDCi дизел со 150 коњски сили и 6-брзински мануелен менувач, или опцијата од 180 коњски сили со 6-брзински автоматски менувач и погон на сите тркала.
Цените сè уште не се објавени, но се очекува да се повисоки отколку кај сегашната Kuga со врвни спецификации.