Ford ги објавија спецификациите за најновиот 2018 Mustang, откривајќи подобрувања на моќноста и на 5.0 литарскиот GT модел, но и на 2.3 литарскиот 4-цилиндричен EcoBoost.
Mustang GT со 5.0 литарскиот V8 мотор сега ќе има 460 коњски сили и 569Nm вртежен момент, додека „коњажата“ на 2.3 литарскиот модел ќе се накачи на 310 коњски сили. Помоќниот модел ќе забрзува од 0-100км/ч за 4 секунди, додека послабиот за 5.
Сите овие спецификации се однесуваат за американскиот модел, а оние за европските и британските модели нема да бидат објавени уште неколку месеци, и можно е да се разликуваат бидејќи вообичаено американските верзии се помоќни.
Покрај зголемената моќност, подобрениот модел за 2018 ќе нуди и променет изглед како и нова технологија во кабината.
Измените се мали но забележливи – предницата е променета со нов аглест преден браник со намалени отвори за воздух на долниот дел, и нови триаголнести отвори. Променети се и фаровите кои имаат сличен облик на оние на сегашниот модел, но се потенки.
На задниот дел забележлив е новиот спојлер, дел од Performance пакетот.
Во поглед на менувачите, понудени ќе бидат 6-брзински мануелен (прилагоден за оптимален вртежен момент и кај двата модела), како и нов 10-брзински автоматски.
Ентериерот во кабината останува идентичен како и на сегашниот модел, со тоа што му е надополнет infotainment системот со нова 12 инчна LCD дигитална инструмент табла на која може да се нагодат изгледот, боите и сл., кои ги менуваат традиционалните аналогни брзинометри и разни бројачи.
Новата MyMode функција ќе им овозможи на возачите да ги снимат омилените нагодувања на инструмент таблата, а за прв пат кај некој Mustang модел вграден е и систем за полуавтоматска автономна асистенција на возачот кој вклучува асистирање пред судар со детекција на пешаци, помошник за одржување на движењето во ленти, како и систем за предупредување на возачот.
Цените сè уште не се објавени, а новиот модел на Ford Mustang ќе се појави во салоните на почетокот на 2018.