Англискиот производител на спортски автомобили Ariel објави планови за креирање на хипер-автомобил со „ултра-високи перформанси“, кој моментално се развива под името HIPERCAR. Kога ќе се појави на пазарот во 2019 најверојатно ќе се вика Elektron.
Проектот започнал во 2014 како студија за истражување на идната насока на малиот Британски бренд и како би можел да ја зголеми понудата покрај постоечките модели Atom и Nomad. Резултат на таа студија е токму идниот Elektron, чиј прв прототип ќе биде прикажан наредниот месец.
Иако дизајнот на автомобилот сè уште не е финализиран, Ariel објавија неколку слики кои откриваат во која насока тој ќе се движи – а тоа е со каросерија со екстремен изглед, составена од мноштво панели.
За неговата конструкција ќе се користат лесни материјали и јаглеродни влакна, а ќе биде поставен врз лесна алуминиумска структура.
Од компанијата велат дека секој од моторите ќе има моќност од околу 300 коњски сили и 450Nm вртежен момент, а се развиваат верзии со погон само на задните, но и на сите тркала. Ова значи дека најмоќниот модел би имал моќност од 1200 коњски сили и погон на сите тркала (со по 2 мотора на секоја оска), а оној со погон само на задните би имал 600 коњски сили.
Врвните перформанси ќе нудат забрзување од 0-100км/ч за 2.4 секунди и максимална брзина ограничена на 260км/ч. Моторите се развиваат во соработка со компаниите Equipmake и Аim Co Japan.
Моделот со погон на сите тркала ќе користи батерии со капацитет од 42kWh, додека оној со погон на задните од 56kWh, и ќе има поголем домет. Се очекува HIPERCAR, т.е Elektron да навлезе во целосна продукција во 2020-та.