Rolls-Royce е бренд кој е познат по своите луксузни автомобили, а наскоро може да почне да произведува софистицирани морнарички бродови.
Компанијата изрази желба да изгради автономен морнарички брод кој би го намалил ризикот за екипажот како и оперативните трошоци. Тој би бил долг 60 метри, би достигнувал брзина од над 45км/ч, би патувал над 3500 наутички милји, а би можел да функционира над 100 дена патролирајќи, набљудувајќи ја околината и детектирајќи подводни мини.
Комплетно електричниот погон од 1.5MW би се состоел од два Rolls-Royce MTU 4000 Series генератори кои на бродот би му овозможувале околу 4MW електрична енергија. Серија од соларни панели и можноста за складирање на 3000kWh енергија исто така би му овозможувале движење, за кое време би собирал дополнителна енергија.
Во него би била имплементирана комбинација од вештачка интелигенција и сензори, како и разни системи и алатки кои би му помагале во остварувањето на мисиите.
Ваквите бродови без екипаж не се наменети да ги заменат обичните, туку да бидат измешани со сегашните флоти и да се користат за мисии каде ќе имаат одредена улога, а некои би се користеле и исклучиво за пренесување на товар.
Компанијата сè уште не објавила дали создавањето на ваков брод планира да го оствари во партнерство со уште некоја, но кажано е дека постои зголемен интерес од разни морнарици. Се очекува вакви автономни бродови да се приклучат на воените флоти во наредните 10 години.