Renault на овогодинешното Frankfurt Motor Show го претстави футиристичкиот концепт на нивниот електричен автомобил со 4-то ниво на автономност, кој би можел да се очекува до 2030-тата.
Наречен Symbioz, според старогрчкиот збор за „заедничко живеење“, овој автомобил е наменет за многу повеќе од само транспорт, и може да се користи како „модуларна дополнителна соба“ за вашиот дом.
Концептот е долг 4.7 метри и е со големина на големо фамилијарно возило, а екстериерот има сличности со модерна куќа дизајнирана од архитект. Горниот дел е направен скоро целосно од стакло, и е споен со долниот (направен од јаглеродни влакна) со високо-технолошки процес на емајлирање.
Седиштата автоматски се наведнуваат за да им овозможат на патниците што поголема комоција, а ентериерот се состои од огромен OLED дисплеј од 80cm прекриен со Gorilla Glass кој се наоѓа пред возачот, а кога автономниот мод е активиран целата командна табла се повлекува за 15cm. Седиштата тогаш се поставуваат околу масата која се отвора во центарот на кабината.
Symbioz ќе вклучува многубројни сервиси – патниците ќе бидат идентификувани штом влезат во него, а автомобилот ќе може да комуницира и со домашните апарати.
Напојуван ќе биде со 2 електрични мотори на задните тркал со вкупна моќност од 680 коњски сили, 660Nm вртежен момент, и забрзување од 0-100км/ч за помалку од 6 секунди. Дометот со едно полнење на батериите ќе му биде околу 500км, a индуктивното полнење ќе овозможува полнење на батериите на 80% за само 20 минути.
