Ford ја претставија подновената верзија на нивниот пикап модел Ranger пред неговото глобално деби на Detroit Motor Show, каде ќе ја дели бината со новиот Ford Edge ST.
Ревидираниот ривал на Mitsubishi L200 прво ќе се појави во продажба во Северна Америка, а подоцна годинава и во останатите земји.
Визуелно, подновениот модел има некои малечки дизајнерски подобрувања. Тука е промената на формата на предните фарови и потенка предна решетка, како и вдлабнатото име на самата каросерија на вратата од багажникот т.е пикап платформата.
Во САД новиот Ranger ќе се продава во варијанта со 2.3 литарски турбо EcoBoost бензински мотор со 10-брзински автоматски менувач, кој според Ford ќе нуди перформанси како оние на V6 мотор, но со ефикасност на 4-цилиндричен мотор.
Ќе бидат на располагање модели со погон на 2 и 4 тркала, како и нов FX4 Off-road пакет кој ќе нуди систем за менаџирање на теренот за возење, со 4 модови – нормален, снег, кал и песок.
Во внатрешноста промените се минимални, а вграден е SYNC 3 infotainment системот на Ford со Apple CarPlay и Android Auto, како и B&O Play звучен систем и 4G WiFi конективност.